愉快周末

小朋友永遠都係快樂嘅一群，卡媽知道小朋友們一直都好希望同卡豬聚一聚，所以趁住周末天氣尚算唔錯，相約4位小朋友們兩家人，連同我哋一家三口子，一齊搭車前往西貢逛一逛。

卡豬一向"好客"，係名副其實嘅"公關狗"，見到小朋友們當然上前打招呼啦! 不過因為卡豬成日有撲人嘅陋習，於是我一直都牽住佢令佢冷靜落黎，一陣子後卡豬已冇撲人了，仲坐定定任小朋友摸摸呢，真係good girl!

小朋友們第一次見卡豬，初時顯得雀躍，跟住就有啲怕怕... 之後當大家熟絡了，四個小朋友仲一齊拖住卡豬一齊散步西貢碼頭呢，真可愛!

 

小朋友們開始同卡豬一齊散步草地上:

 

小朋友們戰戰兢兢同卡豬合照:

 

Michelle, 做咩扁咀呀? 學下卡豬笑多d啦:

 

細佬, 你係咪未瞓醒呀?

 

Stephanie最勇敢, 又跟我哋一架車, 同卡豬一齊合照又最輕鬆:

 最膽小就係Kelly了, 佢似放風箏多過放狗:

卡豬幾時都笑得咁天真爛漫呢: 

 

卡豬真係既靚女又乖乖 (oops, 唔好讚壞個臭豬先!):

同場加映：響碼頭見到一人一金毛，好熟面口啊，原來係卡豬契媽同佢bf Terry!!! 跟住契媽仲拿拿林帶埋我契女囡囡同菲菲黎見我，真係開心呢! (可惜Terry當時發緊爛渣, 冇機會合照, 事源因為佢阿媽冇帶ball ball落街同佢玩... 唉~ 真係大少一名!!!)

中秋佳節慶團圓

今年係第一年同卡豬過中秋, 緊係要同佢一齊去賞下月光啦, 於是就同卡爸去買咗啲螢光條, 一家三口嚟一個應節裝扮就行街街喇, 沿途仲見到唔少街坊狗狗出咗嚟賞月呢!

 

 

 

 

當中就有波子爸媽喇, 卡豬好喜歡佢地架, 除咗成日有抱抱外, 仲有米派, 哈哈~ 多謝波子媽! 

 

 

 

晒咗成個鐘月光, 卡豬都有啲累了, 因為朝早已經游過早水, 係下午瞓咗晏覺仔, 而家又行成個鐘, 唔累就假喇!!!

 

(卡豬: 媽媽, 快啲帶我返屋企歎冷氣啦)

 

莫卡處女下海

卡豬今年中秋佳節好開心呀, 除咗同terry哥哥人月兩團圓之外, 仲係我咁大個女第一次處女下海呢! 媽媽話佢初時都有啲擔心我架, 好在我好叻叻, 由契媽幫手抱我出海, 而我只係一心向住響岸邊嘅媽媽係咁游過去, yeah!!! 成功喇!!!

 

 

 

上到岸當然要fing水抖一抖啦, 契媽真係不遺餘力, 抱咗我出海十次八次(唔記得喇)... 總之每次我都係向住媽媽方向努力游游游...

 

 

 

我都覺得啲水水好好玩, 不過都仲係有啲驚驚, 唔敢主動游出去, 比多幾次我練下應該冇問題嘅, 因為我都好想同terry哥哥鴛鴦戲水呢!!!

 

 

 

 

terry哥哥就游到累晒, 我唔敢騷擾佢, 不過契媽叫我地大方合照喎... 嘻嘻, 你睇我地笑得幾開心

 

 

媽媽, 快啲再帶我地嚟游水水啦!!!